އިންސާނީ ހައްޤުތަކަށް ހޭލުންތެރިކުރުމުގެ ގޮތުން ކޮމިޝަނުން 12 މޭ އިން 15 މޭ އަށް ހއ. އަދި ހދ. ގެ ރަށްތަކަށް ޒިޔާރަތްކޮށް އިންސާނީ ހައްޤުތަކަށް އަހުލުވެރިކުރުމަށާއި ވިސްލްބްލޯކުރާ ފަރާތްތައް ރައްކާތެރިކުރުމުގެ ޤާނޫނަށް އަހުލުވެރިކުރުމަށް ދައުލަތުގެ އިދާރާތަކާއި ސަރުކާރުގެ ކުންފުނިތަކުގެ މުވައްޒަފުންނާއި މަދަނީ ޖަމިއްޔާތަކުގެ މެމްބަރުންނާއި އަދި ރަށްރަށުގެ ރައްޔިތުންނަށް އަމާޒުކޮށް ސެޝަންތަކެއް ނަގައިދީފައިވެއެވެ. މި ހަރަކާތްތަކުގެ މައިގަނޑު މަޤްސަދަކީ މުޖުތަމައުގައި އެއްބަޔަކު އަނެއްބަޔަކާ ގުޅިގެން، އިންސާނީ ހައްގުތަކަށް އާންމުން ހޭލުންތެރިކޮށް، ދައުލަތް ޖަވާބުދާރީކޮށް، އިންސާނީ ހައްގުތަކަށް ވަކާލާތުކުރާ މުޖުތަމައެއް ބިނާކުރުމެވެ.

މިގޮތުން، ހދ. ކުޅުދުއްފުށީގައި މި ހަރަކާތްތައް ކުރިއަށްގެންގޮސްފައިވަނީ  ކުޅުއްދުއްފުށީ އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި ހިއުމަން ރައިޓްސް ކޮމިޝައިން ގުޅިގެންނެވެ.

މި ދަތުރުގައި ހދ. ދިއްދޫ، ހދ. ހަނިމާދޫ، ހދ. ފިނޭ އަދި ހދ. ނޮޅިވަރަންފަރުގައިވެސް ހޭލުންތެރިކުރުމުގެ ހަރަކާތްތަކެއް ކުރިއަށްގެންގޮސްފައިވެއެވެ. މިގޮތުން ކޮމިޝަނާއި ވިސިލްބްލޯވާ ޕްރޮޓެކްޝަން ޔުނިޓުން އިންތިޒާމުކޮށްގެން ހދ. ފިނޭ، ހދ. ހަނިމާދޫ އަދި ހދ. ނޮޅިވަރަންފަރަށް ޒިޔާރަތްކޮށް ހޭލުންތެރިކުރުމުގެ މަސައްކަތްތަކެއް ކުރިއަށްގެންގޮސްފައިވެއެވެ. ހދ. ހަނިމާދޫއަށް ކުރި ދަތުރުގައި ހދ. ހަނިމާދޫ ސުކޫލަށް ޒިޔާރަތްކޮށް ސުކޫލުގެ ދަރިވަރުންނަށް އިންސާނީ ހައްޤުތަކާ ގުޅޭގޮތުން ހޭލުންތެރިކުރުމުގެ ސެޝަނެއް ބޭއްވިފައިވެއެވެ.

ހަމައެއާއެކު، މިދަތުރުގައި ކޮމިޝަނުން ހއ. ދިއްދޫއަށް ޒިޔާރަތްކޮށް ހއ. އަތޮޅު އެޑިއުކޭޝަން ސެންޓަރގެ އެދުމުގެމަތިން އެ ސެންޓަރުގެ ދަރިވަރުންނަށް ކުޑަކުދިންގެ ހައްޤުތަކާ ގުޅޭގޮތުން ދެ ސެޝަނެއް ނަގައިދީފައިވެއެވެ.

މި ދަތުރުގައި ޖުމްލަ 1023 ފަރާތަކަށް މައުލޫމާތު ފޯރުކޮށްދެވިގެންދިޔައެވެ. މި ސެޝަންތަކުގައި މައިގަނޑުގޮތެއްގައި އަލިއަޅުވާލާފައިވަނީ އިންސާނީ ހައްޤުތަކަށް އަހުލުވެރިކުރުމަށާއި ވިސްލްބްލޯކުރާ ފަރާތްތައް ރައްކާތެރިކުރުމުގެ ޤާނޫނަށް އަހުލުވެރިކުރުމަށާއި އަދި ކުޑަކުދިންގެ ހައްޤުތަކަށް އަހަލުވެރިކުރުމަށެވެ.