ދިވެހިރާއްޖޭގައި އިންސާނީ ޙައްޤެއްކަމުގައި ބެލެވެނީ ދިވެހިރާއްޖޭގެ ޤާނޫނުއަސާސީގެ ދަށުން ލިބިދޭ ޙައްޤުތަކަށާއި ދިވެހިރާއްޖެއިން ޢަމަލުކުރަންޖެހޭ ސަރަޙައްދީ އަދި ބައިނަލްއަޤްވާމީ މުޢާހަދާތަކާއި ޤަރާރުތަކުގައި ބަޔާންކޮށްފައިވާ ޙައްޤުތަކުގެ ތެރެއިން އިސްލާމްދީނުގެ އަސްލަކާ ޚިލާފުނުވާ ޙައްޤުތަކަށް. މިއީ 2008 ގައި ފާސްކޮށްފައިވާ ޤާނޫނުއަސާސީގައި އިންސާނީ ޙައްޤުތައް މާނަކުރުމުގައި ބަލާފައިވާ މިންގަނޑު.

އިންސާނީ ޙައްޤުތައް ފޯރުކޮށްދިނުމުގެ މައިގަނޑު ޒިންމާ އޮންނަނީ ދައުލަތުގެ މައްޗަށް. މިގޮތުން ދައުލަތުގެ އެކި ބާރުތަކާއި މުއައްސަސާތަކުން ރައްޔިތުންނަށް ފޯރުކޮށްދޭން ޖެހޭ ޙައްޤުތައް ޤާނޫނުއަސާސީއާއި ޤާނޫނުތަކުގައި ބަޔާންވެގެންވޭ. ވެރިކަން ކުރާ ބާރުން، ނުވަތަ ސަރުކާރުގެ މުއައްސަސާތަކުން އިންސާނީ ޙައްޤުތައް ފޯރުކޮށްދިނުމުގައި މުހިންމު ރޯލެއް އަދާކުރޭ. މިސާލަކަށް، ތަޢުލީމު ލިބުމުގެ ޙައްޤު ފޯރުކޮށްދިނުމުގެ ގޮތުން، ސްކޫލްތައް އެޅުމާއި ހިންގުމާއި، ޓީޗަރުން ހޯދުމާއި ތަމްރީނުކުރުމާއި، ފަށާ ތަޢުލީމާއި، މެދުމަދުރަސީ ތަޢުލީމު ޙާސިލުކުރާ ކުދިންނަށްހިލޭ ކިޔެވޭނެ ގޮތް އިންތިޒާމުކުރަނީ ސަރުކާރުގެ ފަރާތުން މިނިސްޓްރީ އޮފް އެޑިއުކޭޝަނުން.

އިޙްތިރާމްކުރުން:

ރައްކާތެރިކޮށްދިނުން:

ފޯރުކޮށްދިނުން:

އިންސާނީ ޙައްޤުތަކާ ގުޅޭގޮތުން ފަރުދުންގެ އަދި މުޖުތަމަޢުގެ ޒިންމާއަށް ބަލާލާއިރު ކޮންމެ ފަރުދަކަށް ލިބިގެންވާ ޙައްޤުތަކާއެކު އަންނަ ޒިންމާތަކެއްވޭ. އެގޮތުން ކޮންމެ މީހަކުވެސް އަދާކުރަންޖެހޭ މަސްޢޫލިއްޔަތުތަކަކާއި ވާޖިބުތަކެއް ހިމެނޭ. އިންސާނީ ޙައްޤުތައް ހޯދާ ލިބިގަތުމަށްޓަކައި މަސައްކަތްކުރުމަކީ ކޮންމެ މީހެއްގެވެސް ޒިންމާއެއް. ދައުލަތުން އިންސާނީ ޙައްޤުތައް ފޯރުކޮށްދިނުމަށްޓަކައި ޚިދުމަތްތައް ލިބޭނެ މަގު ފަހިކޮށްދީފައި އޮތް ކަމުގައިވި ނަމަވެސް އެޙައްޤުތައް ހޯދާ ލިބިގަތުމަށް މަސައްކަތްނުކުރާހާ ހިނދު އެޙައްޤު އެންމެ އެކަށޭނަ ގޮތުގައި ލިބުމުގެ ދަތިތަކެއް ހުރެދާނެ. މީގެ އިތުރުން ދައުލަތުން އިންސާނީ ޙައްޤުތައް ފޯރުކޮށްދިނުމަށްޓަކައި ކުރާ މަސައްކަތްތަކަށް ކޮންމެ މީހަކު ވެސް އިޙްތިރާމްކުރަންޖެހޭ. އަދި ހަމައެހެންމެ އެކަކު އެނަކަކުގެ ޙައްޤަށް ރައްކާތެރިވެ ތިމާގެ ޙައްޤުގެ ބޭނުން ހިފާއިރު އަނެކާގެ ޙައްޤަށް އުނިކަމެއް ނާންނާނެހެން ޢަމަލުކުރުމަކީ ކޮންމެ މީހެއްގެ ވެސް ޒިންމާއެއް. ދިވެހިރާއްޖޭގެ ޤާނޫނުއަސާސީގެ 67 ވަނަ މާއްދާގައި ބަޔާންކޮށްފައިވާގޮތުގައި، ކޮންމެ މީހަކަށްމެ ލިބޭ ޙައްޤުތަކާއި މިނިވަންކަމާއި، އެމީހަކު އަދާކުރަންޖެހޭ މަސްއޫލިއްޔަތުތަކާއި ވާޖިބުތަކަކީ ވަކިނުކުރެވޭނެ ދެ އަސާސެއް.