• ތަފާތުނުކުރުން
• ދިރިހުރުމާއި ހެދިބޮޑުވުން
• ކުޑަކުދިންގެ މަޞްލަހަތަށް އިސްކަންދިނުން
• އަޅާލުމާއި ހިމާޔަތް ލިބުން
• ޖިންސީގޮތުން ނާޖާއިޒު ބޭނުންހިފުމާއި، ޖިންސީ ގޯނާކުރުމުން ރައްކާތެރިކަން ލިބުން
• އަނިޔާއާއި ގޯނާކުރުމާއި އަޅާނުލުމުން ރައްކާތެރިކަން ލިބުން
• އަމިއްލަވަންތަކަން ދެމެހެއްޓުމުގެ ޙައްޤު
• މައިންބަފައިން އެނގުމާއި އެމީހުންގެ އަޅާލުން ލިބުމުގެ ޙައްޤު
• މަޢުލޫމާތު ހޯދައިލިބިގަތުމުގެ ޙައްޤު

ކުޑަކުދިންގެ ޙައްޤުތައް ރައްކާތެރިކުރުމާއި ރައްކާތެރިކަން ފޯރުކޮށްދިނުމުގައި ސަރުކާރާއި މައިންބަފައިންނާއި ޢާއިލާ، މުދައްރިސުން އަދި މުޖުތަމަޢުގެ ޒިންމާވެއެވެ.

ކޮންމެ ކުއްޖަކަށްވެސް އިޙްތިރާމްކޮށް، ޙިމާޔަތްކޮށް، ޙައްޤުތައް ފޯރުކޮށްދިނުމަކީ ސަރުކާރުގެ ވާޖިބެކެވެ. އޭގެތެރޭގައި ޞިއްޚީ ޚިދުމަތާއި ތަޢުލީމާއި ޞިއްޚަތއް ފައިދާހުރި ކާބޯތަކެއްޗާއި ބޯހިޔާވަހިކަމާއި އަނިޔާއާއި ގޯނާއާއި ނާޖާއިޒްފައިދާ ނެގުމުން ރައްކާތެރިކަން ލިބުން ފަދަ އަސާސީ ޙައްޤުތައް ކުޑަކުދިންނަށް ލިބޭނެ އިންތިޒާމު ހަމަޖެއްސުން ހިމެނެއެވެ. ކުޑަކުދިންގެ މަސްލަހަތު ދަމަހައްޓައި، އެކުދިންގެ މުޅި ދުޅަހެޔޮކަމާއި ތަރައްގީ ރައްކާތެރިކޮށްދޭ ގާނޫނުތަކާއި ސިޔާސަތުތަކާއި ޕްރޮގްރާމްތައް ފުޅާ ދާއިރާއެއްގައި ސަރުކާރުން ތަންފީޒު ކުރުމާއި އެކަމަށް އެކަށީގެންވާ ވަސީލަތްތައް ކަނޑައެޅުމާއި، ކުޑަކުދިންގެ ޙައްޤުތައް ރައްކާތެރިކުރުމަށް ހަރުދަނާ ނިޒާމުތައް ގާއިމްކޮށް، އާއިލާތަކާއި މުޖުތަމައުތަކާއި މަދަނީ ޖަމިއްޔާތަކާ ގުޅިގެން މަސައްކަތްކޮށް، ކުޑަކުދިންގެ ތަރައްޤީއާއި ކުރިއެރުން އަދި، އެކުދިންގެ ގާބިލުކަމަށް ވާސިލުވެވޭނެ މާހައުލެއް ގާއިމުކުރަން ޖެހެއެވެ. މީގެއިތުރުން، ކުޑަކުދިންގެ ޙައްޤުތައް ކަށަވަރުކޮށްދޭ ފަރާތަކަށްވެ، މި އަސާސީ ޙައްޤުތައް ކުރިއަރުވައި ޙިމާޔަތްކުރުމަށް އަޅަންޖެހޭ ހުރިހާ ފިޔަވަޅެއް އެޅުމަކީ، ސަރުކާރުގެ މަސްއޫލިއްޔަތެކެވެ.

މައިންބަފައިންގެ މަސްއޫލިއްޔަތަކީ ދަރިން ތަރުބިއްޔަތުކޮށް، އެކުދިންގެ ފުދުންތެރިކަން އެންމެ ފުރިހަމަގޮތުގައި ކުރިއެރުވުމަށް މަގުފަހިކޮށްދޭ ރައްކާތެރި އަދި އަޅާލާ މާހައުލެއް ގާއިމްކޮށްދިނުމެވެ. އޭގެތެރޭގައި ކާބޯތަކެއްޗާއި ބޯހިޔާވަހިކަމާއި ޞިއްޚީ ފަރުވާއާއި ތައުލީމު ފަދަ އަސާސީ ބޭނުންތައް ފުއްދައިދިނުމާއި ގެއްލުމާއި އަނިޔާ އާއި ގޯނާ ކުރުމާއި އެކުދިންގެ ނާޖާއިޒް ފައިދާ ނެގުމުން ރައްކާތެރިކުރުން ހިމެނެއެވެ. ހަމައެއާއެކު، ކުޑަކުއްޖެއްގެ ނުވަތަ ކުޑަކުދިންނާ ގުޅޭ ކަންކަމުގައި ނިންމުންތައް ނިންމަންޖެހޭނީ އެކުދިން ނުވަތަ ކުއްޖާގެ މަސްލަހަތަށް އެންމެ ބޮޑު އިސްކަމެއް ދީގެންނެވެ.

މުދައްރިސުންނާއި ސްކޫލްތަކުގެ މަސްއޫލިއްޔަތުގެ ތެރޭގައި، ތަފާތުކުރުމާއި، އަނިޔާއާއި ގޯނާއިން އެއްކިބާވެފައިވާ އުނގެނުމުގެ މާޙައުލެއްގައި، ރައްކާތެރި، ހުރިހާ ކުދިންނަށް ހަމަހަމަކަމާއި އެކު ބައިވެރިވެވޭ، ފެންވަރު ރަނގަޅު ތަޢުލީމުގެ ޙައްޤު ކަށަވަރުކޮށްދިނުން ހިމެނެއެވެ. މުދައްރިސުންނަކީ ކުދިންގެ ރައްކާތެރިކަމާއި، އެކުދިންގެ އުނގެނުމާއި، ކުރިއެރުމަށް މަގުފަހިކޮށްދިނުމުގައި ވަރަށް މުހިންމު ދައުރެއް އަދާކުރަންޖޭހޭ ބައެކެވެ. އަދި ކުޑަކުދިންގެ ޙައްޤުތަކަށް އަރައިގަތުމުގެ ނުވަތަ ނިގުޅައިގަތުމުގެ އެއްވެސް އަމަލެއް ހިނގާކަން އެނގޭނަމަ އެކަން ރިޕޯޓްކުރަންވާނެއެވެ.

ކުޑަކުދިންގެ ޙައްޤުތަކަށް އިޙްތިރާމްކޮށް، ކުރިއަރުވައި ރައްކާތެރިކުރުމަކީ މުޅި މުޖުތަމަޢުގެ ޒިންމާއެކެވެ. މުޖުތަމަޢުގެ ކޮންމެ މީހަކުވެސް ކުޑަކުދިންގެ ޙައްޤުތަކުގެ މައްސަލަތަކަށް ހޭލުންތެރިވެ، ކުޑަކުދިންގެ ކުރިއެރުމާއި ތަރައްޤީ، އަދި އެކުދިންގެ ފުރިހަމަ ޤާބިލުކަމަށް ވާޞިލުވެވޭނެ ރައްކާތެރި މާހައުލެއް ޤާއިމުކުރުމަށްޓަކައި މަސައްކަތް ކުރަން ޖެހެއެވެ.

އޭގެތެރޭގައި ކުޑަކުދިންނަށް ކުރާ އެއްވެސް ބާވަތެއްގެ އަނިޔާއާއި ގޯނާއާއި ނާޖާއިޒް ފައިދާ ނެގުމުން ނުވަތަ ތަފާތުކުރުން ފަދަ ކަންކަން ބަލައިނުގަންނަ ޒީރޯ ޓޮލަރެންސްގެ ސަގާފަތެއް އުފެއްދުން ހިމެނެއެވެ. މުޖުތަމަޢު ގުޅިގެން ހޭލުންތެރިކަން އިތުރުކޮށް، ވިސްނުން ބަދަލުކޮށް، ކުޑަކުދިންގެ ޙައްޤުތަކަށް އުނިކަމެއް އަތުވެއްޖެނަމަ އެކަން ކަމާބެހޭ އިދާރާތަކަށް ހުށަހެޅުމަކީ އެންމެންގެވެސް ޒިންމާއެކެއެވެ.

• މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް ހޮޓްލައިން 1421
• ކުޑަކުދިންގެ ހެލްޕްލައިން 1412
• ދިވެހި ފުލުހުންގެ ޚިދުމަތް 119
• ފެމިލީ އެންޑް ޗައިލްޑް ޕްރޮޓެކްޝަން ޑިޕާރޓްމަންޓް (އެފްސީޕީޑީ) 3000600
• ޗިލްޑްރަންސް އޮމްބަޑްސްޕަރސަންސް ހޮޓްލައިން 1656
• ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ ހޮޓްލައިން 1424