އެންޓި ޓޯޗަރ ޤާނޫނުގެ މަޤްސަދުތަކުގެ ތެރޭގައި ހިމެނެނީ ޓޯޗަރ އަކީ މުތުލަގް ޙައްޤެއްކަމުގައާއި އެއްވެސް ޙާލަތެއްގަ ނުހިފެއްޓޭނެ ޙައްޤެއް ކަމުގައި ކަނޑައެޅުމެވެ. މިސާލަކަށް ހަނގުރާމައިގެ ޙާލަތުގައި ވިޔަސް، ކުއްލި ނުރައްކަލުގެ ޙާލަތުގައި ވިޔަސް، ނުވަތަ ޤުދުރަތީ ކާރިސާއެއްގަ ވިޔަސް، އެއްވެސް ޙާލަތެއްގައި ނުހިފެހެއްޓޭނެ ޙައްޤެއްކަން ކަނޑައެޅުމާއި، ޓޯޗަރއަކީ ވަކިކުށެއްކަމުގަ ކަނޑައެޅުމުގެ އިތުރުން، ބަންދުގަ ތިބޭ މީހުންނަށް އެމީހުންގެ އިންސާނީ ޙައްޤުތައް ކޮންމެ ޙާލެއްގައިވެސް ކަށަވަރުކޮށްދިނުމެވެ. މީގެ އިތުރުން، ދިވެހިރާއްޖެ ބައިވެރިވާ މުޢާޙަދާތަކަށް ޤާނޫނީ ބާރުދިނުމާ، އަނިޔާލިބޭ މީހުންނަށް އިންސާފުވެރި ބަދަލެއް ހޯދައިދޭނެ މަގު ތަނަވަސްކޮށްދިނުން ހިމެނެއެވެ. އަދި ދިވެހިރާއްޖޭގައި ޓޯޗަރކުރުން މަނާކުރުމާއި، ހުއްޓުވުމާއި، ރަޙުމްކުޑަ ލާއިންސާނީ އަދި އިހާނެތި ޢަމަލު ހިންގުން މަނާކުރުމާއި، ހުއްޓުވުމާއި، އިންސާނީ ކަރާމާތްގެއްލޭފަދަ އަދަބުދިނުން މަނާކުރުމާއި ހުއްޓުވުމާގުޅޭ މައިގަނޑު ސިޔާސަތުތައް ބަޔާންކޮށް، އެފަދަ އުސޫލުތައް ބަޔާންކުރުމާއި، އެފަދަ އަދަބުތައް ދޭ ފަރާތްތަކާއި، އެފަދަ ޢަމަލުތައް ހިންގާ ފަރާތްތަކުން އެކުރާ ކަންކަމަކީ ކުށްކަމުގައި ކަނޑައަޅައި، އެފަރާތްތަކަށް އަދަބު ދިނުމުގެ އުސޫލުތައް ބަޔާންކުރުންވެސް މި ޤާނޫނުގެ މަޤްސަދުތަކުގެ ތެރޭގައި ހިމެނެއެވެ.

އެންޓި-ޓޯޗަރ ޤާނޫނު 2013ގެ ދަށުން ހިއުމަން ރައިޓްސް ކޮމިޝަނުގެ މައްޗަށް ލާޒިމުކުރާ ކަންތައްތަކެއްވެއެވެ. މިގޮތުން ޓޯޗަރގެ އަމަލެއް ހިނގައިފިނަމަ އެމައްސަލައެއް ތަޙްޤީގުކުރުމަކީ މިޤާނޫނުގެ ދަށުން ކޮމިޝަނާ މަތިކުރެވިފައިވާ ޒިންމާއެކެވެ. އަދި މީގެ އިތުރުން ދަޢުލަތުގެ ބެލުމުގެ ދަށުގައި މިނިވަންކަން ގެއްލޭގޮތަށް ބަންދުކޮށްފައިވާ ކުޑަކުދިންނާއި މީހުން ތިބޭ ތަންތަނަށް ޒިޔާރަތްކޮށް އެކަންކަން މޮނިޓަރކޮށް އިންސްޕެކްޓްކުރުމަކީވެސް ކޮމިޝަންގައި ޤާޢިމުވެފައިވާ ނޭޝަނަލް ޕްރިވެންޓިވް މެކޭނިޒަމްއާ މަތިކުރެވިފައިވާ ޤާނޫނީ ޒިންމާއެކެވެ. އެއާއިއެކު ޓޯޗަރ އާ ގުޅޭގޮތުން އާންމުންނާއި ކަމާބެހޭ ފަރާތްތައް ހޭލުންތެރިކޮށް، ތަމްރީންކުރުމުގެ ޒިންމާއަކީވެސް ހިއުމަން ރައިޓްސް ކޮމިޝަނުން ކުރަންޖެހޭ ކަމެކެވެ. އެގޮތުން، މީހުން ބަންދުކޮށްފައިވާ ތަންތަނުގެ މަސައްކަތްކުރާ މުއައްޒަފުންނާ، ސިއްޙީ ދާއިރާގައި މަސައްކަތްކުރާ މުއައްޒަފުންނާ، ސިފައިންނާއި ފުލުހުން އަދި މޯލްޑިވްސް ކަރެކްޝަނަލް ސަރވިސްގަ މަސައްކަތްކުރާ އޮފިސަރުންނަށް އެންޓި-ޓޯޗަރ ޤާނޫނާއި، ބައިނަލްއަޤްވާމީ މުޢާޙަދާތަކާ ގުޅޭ މަޢުލޫމާތު ފޯރުކޮށްދިނުމަކީ ކޮމިޝަނުން ކުރަމުންއަންނަ މަސައްކަތްތަކެވެ.

މާލޭގައި ގާއިމް ކުރެވިފައިވާ ހިއުމަން ރައިޓްސް ކޮމިޝަންގެ މައި އިދާރާއަށް ނުވަތަ އައްޑޫ ސިޓީގައި ގާއިމްކުރެވިފައިވާ ސަދަން ރީޖަނަލް އޮފީހަށް ރަސްމީ ގަޑީގައި ހާޒިރުވެ، ނުވަތަ ސިޓީއަކުން ނުވަތަ ކޮމިޝަނަށް މައްސަލަ ހުށަހަޅާ ފޯމުތައް މެދުވެރިކޮށް، ނުވަތަ ކޮމިޝަންގެ ހިލޭ ގުޅޭ ނަންބަރ 1424 އަށް ގުޅައިގެންވެސް މައްސަލަ ހުށަހެޅޭނެއެވެ.