މި ޖަލްސާގައި ދައުލަތުގެ މުއައްސަސާތައް، ސްކޫލުތަކުގެ އިސްވެރިން، ސަރުކާރުގެ ޚިއްސާވާ ކުންފުނިތައް އަދި މަދަނީ ޖަމިއްޔާ ޖަމާއަތްތައް ބައިވެރިވެފައިވެއެވެ. ރަސްމިއްޔާތު ޝަރަފުވެރިކޮށްދެއްވާފައިވަނީ މިނިސްޓަރ އޮފް ހެލްތް ޢަބްދުﷲ ނާޡިމް އިބްރާހީމް އެވެ. މި ރަސްމިއްޔާތުގައި ކޮމިޝަނުގެ ރައީސް މަރިޔަމް މުނާ، އައްޑޫ ސިޓީގެ މޭޔަރު އަލީ ނިޒާރު އަދި ރަސްމިއްޔާތުގެ ޝަރަފުވެރި މެހެމާން މިނިސްޓަރ އޮފް ހެލްތް ޢަބްދުﷲ ނާޡިމް އިބްރާހީމް ބައިވެރިންނާ މުހާތަބުކޮށް ވާހަކަ ދައްކަވާފައިވެއެވެ.

މީގެއިތުރުން މި ހަފްލާގައި ހިއުމަން ރައިޓްސް ކޮމިޝަނުން ކުރިއަށް ގެންގޮސްފައިވާ "ރައިޓްސް ސައިޑް އޮފް ލައިފް 2024" ދިރާސާ ޕަބްލިޝްކޮށް އިފްތިތާޚު ކުރުމުގެ ގޮތުން ވީޑިއޯއެއް ދައްކާފައިވެއެވެ. މި ދިރާސާއަކީ ދިވެހިރާއްޖޭގައި ދިރިއުޅޭ ފަރާތްތަކުން އިންސާނީ ހައްޤުތަކަށް އަހުލުވެރިވެފައިވާ މިންވަރު ދެނަގަނެ އިތުރަށް މަސައްކަތް ކުރުން މުހިންމުވާ ދާއިރާތައް ދެނަގަތުމަށް އެޗްއާރްސީއެމް އިން ކޮންމެ 5 އަހަރަކުން 1 އަހަރު ކުރިއަށްގެންދާ ދިރާސާއެކެވެ. މިއީ މި ދިރާސާ ޕަބްލިޝްކުރެވިގެންދިޔަ ހަތަރުވަނަ ފަހަރެވެ.