މިގޮތުން، ޑިސެންބަރު 8 އަދި 9 ވަނަ ދުވަހު ކ. ގުރައިދޫގެ އެކި އިދާރާތަކާއި އާންމުންނަށް އަމާޒުކޮށްގެން އިންސާނީ ހައްޤުތަކަށް ހޭލުންތެރިކުރުމުގެ ޕްރޮގްރާމްތަކާއި އިންސާނީ ހައްޤުތަކާ ގުޅުންހުރި ކަންކަމާ ގުޅޭގޮތުން ޤާނޫނީ ލަފާ ފޯރުކޮށްދިނުމަށް ލީގަލް ކްލިނިކެއް ކުރިއަށް ގެންގޮސްފައިވެއެވެ.

އިންސާނީ ހައްޤުތަކުގެ ދުވަހާ ގުޅުވައިގެން އެކި މުއައްސަސާތަކާ ޖަމިއްޔާތަކާއެކު މިއަދު ކ. ގުރައިދޫގައި އާއިލީ ހަވީރެއްވެސް ވަނީ ބާއްވާފައެވެ. ރަށުގެ އިރުމަތީފަރާތު ފަސްގަނޑުގައި ބޭއްވި މި ހަވީރުގެ މަޤްސަދަކީ އިންސާނީ ހައްޤުތަކަށް މުޖްތަމައު ހޭލުންތެރިކަން އިތުރުކޮށް ގުޅުން ބަދަހިކުރުމެވެ.މި ހަވީރުގައި ބައިވެރިވި ފަރާތްތަކުގެ ތެރޭގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމް.ޓީ.ސީ.ސީ)، އިންދިރާ ގާނދީ މެމޯރިއަލް ހޮސްޕިޓަލް (އައި.ޖީ.އެމް.އެޗް)، ނެޝަނަލް މެންޓަލް ހެލްތު ޑިޕާޓްމެންޓު، ޗިލްޑްރަންސް އޮމްބަޑްސްޕަރސަންގެ އޮފީސް، މޯލްޑިވްސް ގާލް ގައިޑްސް އެސޯސިއޭޝަން، ކ. ގުރައިދޫ ހެލްތު ސެންޓަރ، ކ. ގުރައިދޫ ޕޮލިސް، ޚާއްސަ އެހީއަށް ބޭނުންވާ މީހުންގެ މަރުކަޒު (އެޗް.ޕީ.އެސް.އެން)، ފެމިލީ ޕްރޮޓެކްޝަން އޮތޯރިޓީ (އެފް.ޕީ.އޭ)އަދި ސްޓޭޓް އިލެކްޓްރިކް ކޮމްޕަނީ (ސްޓެލްކޯ) ހިމެނެއެވެ.ބައިވެރިވި ޖަމިއްޔާތަކާއި މުއައްސަސާތަކުން ސްޓޯލްތަކުގައި އެކި ހަރަކާތްތައް ކުރިއަށް ގެންގޮސްފައިވެއެވެ. އަދި މި ހަވީރުގައި ފައްސިހި ބޮޑުބެރު ގުރޫޕާއި 'ރޮބޯމޭން' ގެ ޚާއްސަ ހުށަހެޅުންތަކެއްވެސް ދައްކުވާފައިވެއެވެ.

މި ހަވީރު ސްޕޮންސަރކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމް.ޓީ.ސީ.ސީ)، ސްޓޭޓް ޓްރޭޑިންގް އޯގަނައިޒޭޝަން (އެސްޓީއޯ)، މޯލްޑިވިއަން، މާލޭ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ)، ހައުސިންގް ޑިވެލޮޕްމެންޓް ކޯޕަރޭޝަން (އެޗް.ޑީ.ސީ) އަދި އުރީދޫއިންނެވެ. އަދި މިހަވީރު ކުރިއަށްގެންދިޔުމުގައި ގުރައިދޫ ކައުންސިލާއި ގުރައިދޫގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ވެދެއްވި އެހީތެރިކަން ކޮމިޝަނުން ފާހަގަކުރަމެވެ.