"އިންޓަރ ސްކޫލް ހިއުމަން ރައިޓްސް ކުއިޒް 2024" އަކީ ހޯޕް ފޮ ވިމެން، ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗް.އާރުސީ.އެމް) އަދި ދިވެހިރާއްޖޭގެ އަޑު ގުޅިގެން ކުރިއަށްގެންދިޔަ މުބާރާތެކެވެ. މި މުބާރާތުގެ މަޤްސަދަކީ ދަރިވަރުންނާއި މުޖްތަމައުގެ އެންމެހައި ފަރާތްތަކުގެ މެދުގައި އިންސާނީ ހައްޤުތަކުގެ ހޭލުންތެރިކަން އިތުރުކޮށް އިންސާނީ ހައްޤުތަކުގެ ރޫހު އާލާކުރުމެވެ.

މި މުބާރާތް ކުރިއަށް ގެންގޮސްފައިވަނީ 17 އޮކްޓޫބަރ އިން ފެށިގެން 21 އޮކްޓޫބަރުގެ ނިޔަލަށެވެ. މި މުބާރާތުގައި 5 ސްކޫލަކުން ބައިވެރިވެފައިވެއެވެ. މުބާރާތުގައި ބައިވެރިވި ސްކޫލުތަކުގެ ތެރޭގައި ފާފު އަތޮޅު ތައުލީމީ މަރުކަޒު، ހިރިޔާ ސްކޫލް، އިސްކަންދަރު ސްކޫލް، ރެހެންދި ސްކޫލް އަދި މުޙްޔިއްދީން ސްކޫލް ހިމެނެއެވެ. ދެ ދުވަހެއްގެ މަތިން ކުރިއަށް ގެންދެވުނު ވާދަވެރި މެޗްތަކަކަށްފަހު މުބާރާތުގެ އެއްވަނަ ހޯދާފައިވަނީ ފާފު އަތޮޅު ތައުލީމީ މަރުކަޒެވެ. އަދި ދެވަނަ ހޯދާފައިވަނީ އިސްކަންދަރު ސްކޫލެވެ.

މުބާރާތް ނިމުމުގެ ރަސްމިއްޔާތު ކުރިއަށް ގޮސްފައިވަނީ 21 އޮކްޓޫބަރުގައެވެ. ރަސްމިއްޔާތުގެ ޝަރަފުވެރި މެހެމާނެއްގޮތުގައި ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރު ފާޠިމަތު ސަޢުދާ ބައިވެރިވެވަޑައިގެންނެވިއެވެ. މި ރަސްމިއްޔާތުގައި މުބާރާތް އިންތިޒާމްކުރި އޮފީސްތަކުގެ އިސްވެރިން ބައިވެރިވެވަޑައި ގެންނެވިއެވެ. އަދި މީގެއިތުރުން، މިނިސްޓަރ އޮފް ސްޓޭޓް ފޮރ ހޯމް ލޭންޑް ސެކިއުރިޓީ އެންޑް ޓެކްނޯލޮޖީ ލެފްޓިނެންޓު ކާނަލް ރިޓަޔާޑް ޢަބްދުލްމަޖީދު އިބްރާހީމް މި ރަސްމިއްޔާތުގައި ބައިވެރިވެވަޑައިގެންނެވިއެވެ.

މޮޅުވި ސްކޫލުތަކަށާއި، މުބާރާތުގެ އެންމެ މޮޅު ފަސް ދަރިވަރުންނަށް އިނާމުގެ ތައްޓާއި ހަނދާނީ ލިޔުން ހަވާލުކުރެވުނެވެ. މުބާރާތުގެ އެންމެ މޮޅު ފަސް ދަރިވަރުންނަށް ހޮވިފައިވަނީ އަޝާ މުހައްމަދު (އިސްކަންދަރު ސްކޫލު)، ޔަސްނާ އަހްމަދު (ފާފު އަތޮޅު ތައުލީމީ މަރުކަޒު)، ޝަޔާ މުހައްމަދު (ފާފު އަތޮޅު ތައުލީމީ މަރުކަޒު)، މަޒީނާ އަބްދުﷲ އަހްމަދު (ފާފު އަތޮޅު ތައުލީމީ މަރުކަޒު) އަދި އަހްމަދު އިޔާން އަލީ (ފާފު އަތޮޅު ތައުލީމީ މަރުކަޒު) އެވެ. މީގެއިތުރުން މުބާރާތުގައި ބައިވެރިވި ފާރާތްތަކާއި، ވޮލަންޓިއަރުންނާއި އަދި މުބާރާތް އިންތިޒާމް ކުރެއްވިފަރާތްތަކަށް ސެޓްފިކެޓް ހަވާލުކުރެވުނެވެ.

މުބާރާތް އިންތިޒާމް ކޮށްފައިވަނީ ފެމިލީ ޕްރޮޓެކްޝަން އޮތޯރިޓީ، އިލެކްޝަން ކޮމިޝަން، އެންޓި ކޮރަޕްޝަން ކޮމިޝަން އަދި ރައްޔިތުންގެ މަޖިލީހުގެ ފަންނީ އެހީތެރިކަމާ އެކުގައެވެ. އަދި މި ކުއިޒް ކުރިއަށް ގެންދިއުމަށް އިންޓަރނެޝަނަލް ފައުންޑޭޝަން ފޮ އިލެކްޓޯރަލް ސިސްޓަމްސް (އައިއެފްއެސް)، ޔޫއެސް އޭޖެންސީ ފޮ އިންޓަރނެޝަނަލް ޑިވެލޮޕްމެންޓް (ޔޫއެސްއެއިޑް)، ޔޫއެން ރެޒިޑެންޓް ކޯޑީނޭޓާޒް އޮފީސް (ޔޫއެންއާރްސީއޯ) އަދި ޕަބްލިކް ސާރވިސް މީޑިއާ (ޕީއެސްއެމް) އެހީތެރިވެ ދެއްވާފައިވެއެވެ.