މި ފޯރަމްގައި ރާއްޖޭގެ އެކިކަންކޮޅުތަކުން 29 މަދަނީ ޖަމްއިއްޔާ ޖަމާއަތްހިމެނޭހެން 58 ފަރާތެއް ބައިވެރިވެފައިވެއެވެ. ފޯރަމް ފެށުމުގެ ގޮތުން ކޮމިޝަންގެ ސެކްރެޓަރީ ޖެނެރަލް އާމިނަތު ނަޢުޝާން ޢަބްދުލްމުހައިމިން ބައިވެރިންނާ މުހާތަބްކޮށް ވާހަކަދައްކަވާފައިވެއެވެ. ސެކްރެޓަރީ ޖެނެރަލްގެ ވާހަކަފުޅުގައި މަދަނީ ޖަމްއިއްޔާތަކުގެ މުހިއްމުކަމަށް އަލިއަޅުވާލާ ފޯރަމްގެ ތެރެއިން އެޗްއާރްސީއެމް އާއި މަދަނީ ޖަމްއިއްޔާތަކާ ދެމެދު އޮންނަ ގުޅުން ބަދަހިވެގެންދާނެކަމަށް އުއްމީދުކުރާކަމަށް ވިދާޅުފެފައިވެއެވެ. އަދި މި ފޯރަމަށް މަދަނީ ޖަމްއިއްޔާތަކުން ދެއްވާ އެއްބާރުލުން ފާހަގަކޮށް، މި ފޯރަމްގައި މަދަނީ ޖަމްއިއްޔާތަކުން ދެއްވާ އެއްބާރުލުމަކީ ކޮމިޝަނުން މިއަހަރަށް ރަވާފައިވާ ފޯރަމްތަކާއި ހަރަކާތްތައް ކުރިއަށް ގެންދިޔުމުގައި ވަރަށް މުހިއްމު ދައުރެއް އަދާ ކުރާނެ ކަންތައްތަކެއްކަން ފާހަގަ ކުރައްވާފައިވެއެވެ.

ރައީސް މުނާގެ ވާހަކަފުޅުގައި އެޗް.އާރު.ސީ.އެމް އަކީ ޤާނޫނުއަސާސީ ތަސައްވަރު ކުރާ ފަދަ އިންސާނީ ޙައްޤުތަކަށް ޙުރުމަތްތެރިކޮށް ހިތާ ދިމިގްރާތީ މުޖްތަމަޢެއް ބިނާކުރުމަށްޓަކައި ޤާނޫނުއަސާސީ އާއި ޤާނޫނުތަކުން ވަރަށް މުހިންމު ޛިންމާއެއް މަތިކުރައްވާފައިވާ މުއައްސަސާއެއް ކަމަށާއި، ކޮމިޝަނުގެ މި ޒިންމާތައް އަދާކުރުމުގައި މަދަނީ ޖަމްއިއްޔާތަކާއި ބޭރުގެ އެހީދޭ ޖަމާއަތްތަކުން ދެއްވާ މާލީ އެހީތެރިކަމާއި އަދާކުރައްވަމުން ގެންދަވާ ދައުރުގެ ސަބަބުން ކޮމިޝަނުގެ މަސައްކަތުގެ އިތުރުން މަދަނީ ޖަމްއިއްޔާތަކުގެ މަސައްކަތަށްވެސް ވަރަށްބޮޑު ކުރިއެރުމެއް ލިބިގެންދާ ކަމަށެވެ. އެކަމަށްޓަކައި އެފަރާތްތަކަށް ރައީސް މުނާ ޝުކުރު އަދާކުރެއްވިއެވެ. ރައީސް މުނާގެ ވާހަކަފުޅުގައި 2025 ވަނަ އަހަރު ކޮމިޝަނުން އަދި މަދަނީ ޖަމްޢިއްޔާތަކާ ގުޅިގެން ކޮމިޝަނުން ކުރިޔަށް ގެންދަން ރާވާފައިވާ ޙަރަކާތްތަކުގެ އެކްޝަން ޕްލޭނެއް މި ފޯރަމުގައި އެކުލަވާ ލެވުމުގެ ސަބަބުން ކޮމިޝަނަށާއި މަދަނީ ޖަމްޢިއްޔާތަކުން މިއަހަރު ހިންގަން ރާވާ ކަންކަން ފަސޭހައިން ކުރިޔަށް ގެންދެވި ކޮމިޝަނާއި ޖަމްޢިއްޔާތަކުގެ ގުޅުން ބަދަހިވެގެންދާނެއެވެ.

 ޔޫ.އެން.ޑީ.ޕީ ގެ ރެސިޑެންޓް ރެޕްރެޒެންޓެޓިވް އެންރީކޯ ގަވޭލިއާ ގެ ވާހަކަފުޅުގައި މަދަނީ ޖަމްޢިއްޔާތަކަށް ވެދެވޭ އެހީތެރިކަމަކީ އިންސާނީ ޙައްޤުތައް ދިފާއު ކުރެއްވުމަށް ދެވޭ އެހީތެރިކަމެއް ކަމުގައި ފާހަގަ ކުރައްވައި، ޖަމްއިއްޔާތަކުގެ ދައުރުގެ މުހިންމުކަން ސިފަކުރެއްވިއެވެ

ޔޫ.އެން.ޑީ.ޕީ އަދި އިނގިރޭސިވިލާތުގެ ސަރުކާރުގެ ދީލަތި އެހީތެރިކަމާއެކު ކުރިއަށްދިޔަ ފޯރަމްގެ ބޭނުމަކީ މި ސްޓްރެޓަޖީގެ ދަށުން 2025ވަނަ އަހަރު ކޮމިޝަން އަދި ކޮމިޝަނާ މަދަނީ ޖަމްއިއްޔާ ޖަމާއަތްތަކާ ގުޅިގެން ކުރިއަށް ގެންދާނެ ހަރަކާތްތައް ފާހަގަކޮށް އެކްޝަން ޕްލޭންއެއް އެކުލަވާލުމެވެ. މިގޮތުން ފޯރަމްގެ ތެރެއިން މަދަނީ އެކި ޖަމާއަތްތަކުގެ ތަޖުރިބާއާއި ޤާބިލުކަން ހުރި ދާއިރާތަކާއި ޖަމްއިއްޔާތަކުން މައުލޫމާތާއި އެހީތެރިކަން އިތުރަށް ބޭނުންވާ ދާއިރާތައް ފާހަގަކޮށް ހިއްސާކޮށްފައިވެއެވެ. ފޯރަމް ނިމިގެންދިޔައިރު ފޯރަމްގެ ބައިވެރިންގެ މަޝްވަރާއާއި ނިންމުންތަކަށް ބިނާކޮށް މަދަނީ ޖަމްއިއްޔާތަކުގެ މެދުގައި ހިންގަން މުހިއްމު ހަރަކާތްތަކާއި އެކަން ހާސިލްކުރުމަށް އަޅަންޖެހޭ ފިޔަވަޅުތައް ދެނަގެނެވިފައިވެއެވެ.